* = يختلف من عائلة لعائلة

الايجابيات:

يجبروك على الانتظام - موعد الاكل محدد, غسيل الملابس في يوم محدد*, الجلوس في الصالة تقريبا للساعة عشرة في الليل وبعد كذا لازم تطلع غرفتك عشان لا تزعجهم....الخ الاتكال على النفس: تسوي فطورك بنفسك* تغسل صحونك بعد الاكل* تغسل ملابسك* اليقظة: تودع البرود, وتكون صاحي في تصرفاتك, اذا طلعت الدرج حبه حبه لا تزعج العالم, اذا تروشت لا تتأخر والدش شغال (يمكن تحصل كلمة تجرحك). اذا دق المنبه قم وطفيه, ولا تخليه كل شوي يدق, ما تجيب ضيف ابدا الا اذا اخذت اذن*. تعلم الدقة: في الغالب اذا طلبت نصيحتهم في شي, يعطوك اللي يعرفوه وما يعرفون يفتون, بل احيانا تلاحظ تأتأه في كلامهم مو من ارتباك وانما بحثا عن الكلمات الأدق.

العيوب

اكثر العائلات ما يسولفون معاك بالشكل اللي كنت متوقعه. على العكس بعض العجايز, اذا سألتهم سوآل تندم لانهم ما يصدقون تفتح سالفة, وتجي تبي تقفل الموضوع ما تقدر. الأكل عند بعض العائلات ما ينبلع أكثر العائلات ما يفهمون قواعد اللغة الانجليزية حتى اللي تعليمهم عالي (لكن يتحدثونها بشكل صحيح) المادية (خاصة العوائل الانجليزية), مثال: ممكن لو ملابسك كثير وجيت تغسل تقول لك انت ملابسك كثير ولازم تدفع لانك تكلفنا صابون ملابس فوق اللي احنا معتادين عليه, طبعا لك الحق في استخدام المطبخ واكل ما تشاء, لكن ما بتكون مرتاح لين تجيب لك بسكويتات ومكسرات من السوبر ماركت عشان ما تحس ان احد جالس يراقبك وش ااكلت ووش ما اكلت من اغرضهم. اخيرا العوائل في نظري غير مناسبة للشخص البارد الغير مرتب. العوائل الاقل تعليما افضل بكثير من العوائل ذات التعليم العالي, والسبب ان العوائل الاقل تعليما فيهم روح, وبساطة, وابعد عن الانتظام الزائد. افضل عائلة سكنت معهم كانت مكونة من رجل وامرأة, الرجل عاطل عن العمل رغم انه ثلاثيني, مو متعلم بشكل صحيح, بالقوة يقدر يقرأ, لكن كان انساني بكل ما تعنيه الكلمة. ورغم فقرة ما كانت تعني له المادة اي شيء. كان يسهر, يخرج معي في مشاويري واخرج معه في مشاويره. كل همه المجاعة في افريقيا والحروب والطاقة الشمسية. العائله في الاغلب على ما تعودهم عليه فإن عودتهم على اللامبالاة ما سألوا عنك وتركوك .. وان عودتهم على المشاركه وحب التعلم وحسن التعامل عاملوك بالمثل الاحترام المتبادل وعدم تعدي الحدود حتى مع طيلة فترة اقامتك معهم هو المفتاح لمشاركه ممتعه .. فأنت تشاركهم مصاريفهم ومنزلهم وهم يشاركوك تعليمك ويقدموا لك الخدمات أبو صالح

هل توجد عند العوائل انترنت ,. ولو موموجود هل اقدر اطلبه لو على حسابي .. ؟

بعض العوائل ما عندها نت, تقدر تجيب خدمة النت على حسابك اذاهم وافقوا. او الحل الافضل تاخذ عقد جوال بانترنت عن طريق شريحة الجوال, ويصير تقدر تستخدم النت في اي مكان.

غالبا هل سكن العوائل قريب من المعاهد والجامعات ؟

في الغالب لا.

بالنسبة للطبخ .. هل يكون لحمهم حلال .. وهل على ذوقي ( مثلا احدد الاكل اللي افضله لو بشكل عاام ) .. ؟

بالنسبة للحلال فيعتمد على مفهومك للحلال بالنسبة لي انا آخذ برأي العلماء اللي يقولون انه حلال بدليل الآية "أحل لكم طعام أهل الكتاب" (اذا ما كانوا يهود او نصارى يصير لحمهم مو حلال), طبعا بعض الشباب ياخذون باقوال مشايخ تفيد بان لحم اهل الكتاب هنا مو حلال. (فيه موضوع في المنتدى طويل ناقش أراء العلما في طعام اهل الكتاب, تقدر تطلع عليه وتشوف ليه حرمه بعض العلماء وتطلع على حجج الفريقين وتاخذ بالرأي اللي تشوفة صواب). بالنسبة لتحديد الأكل فيعتمد على العائلة.

هل مسموح لي بالخروج والدخول وقت ما اريد ؟

اذا كان عمرك فوق الـ18 ايه. ابنقلكم تجربتي وهي قصيرة جداً حيث صارلي هنا مايقارب 3 اسابيع ، لكني سكنت مع عائلتين خلال هذة الفترة القصير ...

العائلة الأولى :

كانت عن طريق المعهد .

السلبيات :

السعر غالي حيث كنت ادفع بالاسبوع 135 باوند وهو غالي جدا لكني كنت مجبور. والسلبية الثانية ان العائلة عندهم اطفال وكانوا مزعجين في اكثر الاحيان . ماكان عندهم انترنت .. الأستحمام كان بوقت محدد في الصباح مابين الساعة 6.30-7.30 وكذلك في المساء ماتتعدى الساعة الثامنة مساءً .

الايجابيات :

الغرفة واسعة وكبيرة ومرتبة وكانوا يرتبونها ويبدلون المفارش اسبوعياً . كانوا يغسلون ملابسي اسبوعياً وكنت اعطيهم كمية كثيرة وكانوا يتحملون ، لكن ماكانوا يكوون الملابس . اكلهم بصراحة كان طيب ، واحياناً تجيب اكل جاهز من برا لأنها تداوم .. الحمام اكرمكم الله كان خاص لايستخدمة احد سواي . رحلتي من المنزل الى المعهد كانت تستغرق 40 دقيقة .

العائلة الثانية :

كانت عن طريق معرفة ليس للمعهد علاقة .

السلبيات :

يوجد لديهم كلاب اكرمكم الله ... قلة الباصات التي تؤدي الى المعد والعودة ماكان هناك الاباص واحد ولايأتي الا كل نصف ساعة وفي اغلب الاحيان يتأخر 10-15 دقيقة .

الايجابيات :

السعر ارخص من العائلة السابقة حيث كنت ادفع 85 باوند بالأسبوع . الأكل طيب جداً . يوجد لديهم انترنت . الحمام خاص .لايستخدمة احد سواي . العائلة مكونة من شايب وعجوز ، العجوز ماغير تدخن 24 ساعة ، وسوالفها قليل ، والشايب قليل مااشوفة ... الاستحمام كان بأي وقت ، بس اهم شي لاتطول وانت فاتح الماء .. ملابسي تغسل وتكوى . رحلتي من المنزل الى المعهد تستغرق 30 دقيقة .

بالنسبة للعائلتين :-

اما بالنسبة للأكل ، كانت مكونة من وجبتين ( فطور وعشاء ) . الفطور تقوم بأعدادة بنفسك .. العشاء يقومون بأعدادة ، ويكون جاهز عند الساعة السادسة مساءً ، اذا تأخرت عن موعد العشاء تقوم انت بتسخينة بالميكرويف .. يعني ماعندهم اشكالية من الناحية هذا ، بس اهم شي اذا كانت مانت متعشي عندهم في ذاك اليوم يجب عليك ابلاغهم .... اما بالنسبة للدخول والخروج ماكان عندهم مشكلة ، بس اهم شي تدخل بهدوء وتخرج بهدوء . اما بالنسبة للأكل كنت احددلهم اللي مااكلة ، ، ، واللي اكلة اقولهم علية واحيانا يصلحونة واحيانا لا ..... لكن عموماً انصح بالسكن مع عجوز ، لانها بتكون فاضية ...... وبتسولف معك من الفضاوة ، وتتفنن بالطبخ ... فهد العبدان -هل وجدت صعوبه في ايجاد عائلة اخرى ؟ نوعاً ما هناك صعوبة ،، لأن الموضوع يبي اهتمام وحرص منك انت .... كيف ؟ انا اقولك كيف ، اللي صار معي انا انة اي واحد اواجهه سعودي اوصية ( خصوصاً اللي مع بالكلاس ) والشباب اللي اعرفهم من خارج المعهد ، واطلب منة يسأل العائلة اللي هو ساكن عندها ، وكنت متابع مع الشباب وبيني وبينهم اتصالات ، لأنهم احياناً ينسون الموضوع ، فانا دوري اذكرهم ، فاشباب متعاونين ولاقصروا بصراحة ، حتى حصلت على العائلى اللي انا ساكن معهم الأن . 2- هل انت حددت مواصفات معيينه في العائلة اللي اخترتها .؟ بصراحة ماحددت مواصفات معينة لاني كنت ادور على شي ارخص ، واذا ماعجبتني العائلة ادور براحتي واطلب المواصفات اللي ابيها ، لأن 540 باوند بالشهر كثيرة ، بس الحمدلله اغلب المواصفات موجودة بالعائلة ، لأن قبلي كان فية سعود وطلع من عندهم خلص دراستة وكانت العائلة عارفة النظام ، وش تاكل وش ماتاكل .... 3- هل المعهد اجبرك على عائلة معيينه ولا اعطوك حرية الخيار ؟. المعهد مايجبرك على شي ، ( انت دافع فلوس ) ، بس المعهد يقولك وش المواصفات اللي تبيها بالعائلة ، فكل ماطلبت مواصفات كثيرة كل ماتأخر حصولك على عائلة ، فأنت لاتدقق على سالفة المواصفات ، فأهم شي الأكل ، تقولهم انا ماكل ( لحم الخنزير ، مثلاً ....) ، لأنة انا قلتلهم مااكل لحم الخنزير ، ومابي كلاب بالبيت ،وابيها تغسل وتكوي ،.... عقدتها شوية . وبعد يومين حصلولي عائلة ،،، بس كان عليهم بعض الملاحظات اللي ذكرتها سابقاً .. 4- برنامجك اليومي في البيت .. ؟ ماعندي برنامج محدد بالبيت ، قومة الصبح والفطور ودردشة مع العجوز شوية ، والمعهد ومن ثم الرجعة للبيت وحل الواجبات اذا كان عندك وبعدها العشاء وبعده النت ، وبعدها النوم . . . وسلامتك .... 5- هل العجوز اللي الحين انت معها تسمح لك بمشاهدة التلفزيون معها او لوحدك ..؟ العجوز ماعندها مشكلة تقدر تشاهد معها التلفزيون ، بس لاتطولها شوي وروح لانها هي يجيها زوار واخوانها واعيالها بشكل مستمر ، وبالغرفة عندي تلفزيون ودش ، والأمور زينة ولله الحمدة .. 6- هل تجلسون تسولفون لمده طويله ؟ لا ... بصراحة السوالف قليلة ... 7- الاكل ممكن توضح لنا اكثر وش سوت لك من اكل اليين الحين هههههه ؟ بالنسبة للأكل ، طيب لابأس ، اشكال وانواع بس مهو بالشكل اللي تخيلة او بالكمية اللي حنا متعودين عليها بالسعودية ، صحن تاكلة ( وبالهنا والعافية ) ،،،، احيانا اجيبلها لحم أو دجاج تطبخة لي لأني مااكل من لحهم فالوضع عندها عادي ومتعودة على الشي هذا ... 8- الانتر نت هل مفتوح وكيف السرعه وهل على حسابهم ولا طلبوا منك مبلغ ؟ الأنترنت مفتوح 24 ساعة ، ، ، لا ماكان موجود ، لما جيتهم قلتلها فية انترنت قالت اذا تبي بزود عليك ( 5 ) باوند بالأسبوع ....والسرعة ممتازة جداً ،،، بس ماعندك مشكلة بالأنترنت حتى لوماوفروا انترنت ، تقدر توفرة انت عن طريق اشتراك ، مثل تفضل اخوي ابو أصيل وبقية الأخوة .... 9- المنطقه اللي فيها البيت .. هل انت اخترتها .. وهل يوجد حولك مطاعم عربيه او فاست فود واماكن للتنزه اوقات العصريات ؟ مااخترت المنطقة على حسب مكان العائلة ، وماحولي مطاعم عربية او فاست فود ، بس مافية مشكلة كل شي موجود بمركز المدينة ، واما بالنسبة للتنزة ادنبرة كلها مكان للتنزة .... اي مكان بتروح لة بتستانس فية ، ، ، وبعدين ماعندك هنا وقت تتمشى فية العصرية لانك بتطلع من المعهد متأخر وبتروح للبيت تبي تريح ، الا بأيام اجازة الأسبوع تقدر تطلع وتروح وتتمشى ،،، 10- هل يوجد عرب في الحي اللي انت ساكن فيه ؟ ماادري بصراحة ، لاني الى الأن ماشفت عربي بالمنطقة اللي انا ساكن فيها ،،، والمفترض مايكون عندك عربي علشان مسألة اللغة ، ، ،وبعدين اللي بالمعهد كافين ... فهد العبدان